Saturday, April 17, 2010

മഴനാരുകളോട്

വൈകുവതെന്തേ ഇനിയുമെൻ
തലനാരിഴകളെ
ചുംബിച്ചുണർത്തുവാൻ?
നിൻ തണുപ്പിൽ ലയിച്ച്
സുഖിച്ചു കിടപ്പാൻ കൊതിച്ചിടും
മനമോന്നു വേറെ

നിന്നെ തഴുകിയ വിരലുകൾക്കു
കുളിരായ്,
മീട്ടിയ തന്ത്രികൾ നേർത്ത
രാഗമായ്,
ചിലംബൂരിപ്പിടിച്ചു വരും
കണ്ണകിയെപ്പോൽ
രൌദ്രയായ്,
ഇടയ്ക്ക് നീയൊരു
സ്നേഹമായ്,
താളമായ്,
ലയമൊരുക്കും മേഘമൽഹാറിൻ
ഈണമായ്,
തഴുകിയുറക്കുന്ന താരാട്ടായ്,
വൈകുവതെന്തേ
എന്നെ വന്നൊന്നു പുൽകുവാൻ?

ഇനിയുമൊരു കനവായ് കാത്തുനിൽക്കാതെ
വർഷമേ……………..
എന്റെ പ്രണയത്തിനുമേൽ നീ പതിക്കുക!
ചാഞ്ഞുപെയ്യുന്ന നിൻ നാരുകളിൽ
തൂങ്ങിമരിക്കാനെങ്കിലുമെന്നെ
അനുവദിക്കുക!!!