പെരുന്നാൾ

 

കടലിനപ്പുറം

വർണ്ണക്കടലാസ് ചുവപ്പിച്ച

പാനീസ് വിളക്കിന്റെ അരണ്ട വെളിച്ചം

നിലാവിലേക്കൂർന്നിറങ്ങി

തക് ബീർ മുഴക്കിയപ്പോളാണ്

നീരുവന്ന കാലുകൾ

നീട്ടിവെച്ച് ഉമ്മ

നിറമുള്ള പെരുന്നാളിലേക്ക്

നോവോടെ വിളിച്ചത്

“ഉപ്പയില്ലാത്ത പെരുന്നാളാ…

നീയുണ്ടാവില്ലേ മോനേ…?

കടലിനിപ്പുറം

വർണ്ണങ്ങൾ വിരിയിക്കുന്ന

കരിമരുന്നിന്റെ പ്രഭയിൽ

നിലാവൊളിച്ചിരുന്ന്

കനവിന്റെ കനൽ കെടുത്തുമ്പോളാണ്

നിറമുള്ള പെരുന്നാളിലേക്ക്

ഞാനുമൂർന്നിറങ്ങിയത്

“പെങ്ങളുടെ

നിറമുള്ള മൈലാഞ്ചിച്ചോപ്പിലും

അനിയന്റെ

അറിവിന്റെ അക്ഷരക്കൂട്ടിലും

വീടിന്റെ

ചായംപൂശിത്തീരാത്ത ചുവരിലും

എന്നും കാണുന്നത്

എന്റെ പെരുന്നാളാണുമ്മാ..”

…………………………

ഫോട്ടോ: CM Shakeer (http://grameenam.blogspot.com) 

വർത്തമാനം പെരുന്നാൾ സ്പെഷൽ പതിപ്പിൽ