വൈകുവതെന്തേ ഇനിയുമെൻ
തലനാരിഴകളെ
ചുംബിച്ചുണർത്തുവാൻ?
നിൻ തണുപ്പിൽ ലയിച്ച്
സുഖിച്ചു കിടപ്പാൻ കൊതിച്ചിടും
മനമോന്നു വേറെ
നിന്നെ തഴുകിയ വിരലുകൾക്കു
കുളിരായ്,
മീട്ടിയ തന്ത്രികൾ നേർത്ത
രാഗമായ്,
ചിലംബൂരിപ്പിടിച്ചു വരും
കണ്ണകിയെപ്പോൽ
രൌദ്രയായ്,
ഇടയ്ക്ക് നീയൊരു
സ്നേഹമായ്,
താളമായ്,
ലയമൊരുക്കും മേഘമൽഹാറിൻ
ഈണമായ്,
തഴുകിയുറക്കുന്ന താരാട്ടായ്,
വൈകുവതെന്തേ
എന്നെ വന്നൊന്നു പുൽകുവാൻ?
ഇനിയുമൊരു കനവായ് കാത്തുനിൽക്കാതെ
വർഷമേ……………..
എന്റെ പ്രണയത്തിനുമേൽ നീ പതിക്കുക!
ചാഞ്ഞുപെയ്യുന്ന നിൻ നാരുകളിൽ
തൂങ്ങിമരിക്കാനെങ്കിലുമെന്നെ
അനുവദിക്കുക!!!
ചില കോറിയിടലുകള് ..... എഴുതിയത് കവിതയാണെന്നോ കഥയാണെന്നോ സാഹിത്യമാണെന്നോ അവകാശവാദമില്ല. ഒന്നുണ്ട്, എഴുത്തിന്റെ പേറ്റുനോവ് അനുഭവിച്ചിട്ടുണ്ട്; ഓരോ വരികളിലും....! ഈ കോറിയിടലുകളിൽ ഇടപെടുക, എന്തെങ്കിലുമൊക്കെ കോറിവരഞ്ഞുകൊണ്ട്.
